تورکو بئش لیک «قیرآت» 26 / 8 / 91

یئل قولاقدا قاققیلداشیر من ایله

دومان داغدا گؤزده ایتدیم چَن ایله

گئتدیم تاپدیم قیرآتیمی سن ایله

                                         باغلاشایدیم کوروغلونون عهدیله

                                         ساغلاشایدیم آذربایجان جهدیله

سنین سئودان بوغور منی دالایدا

بیرلیک اولموش اورتادایام هالایدا

دیله دوشموش ایتمیشم من آلایدا

                                       سن سیز آن لار آغی دیر من ایچیره م

                                       شعر سونبولون دوش تارلادا بیچیره م

سئوگین یئلکن سیز گَمی دیر کی دالیر

قورد اولاییر یئل سیزیلدیر غم قالیر

غم ماهنی سین اوخویور قوش ساز چالیر

                                     گئجه لرین قارنیندان گون دوغولور

                                     ظلم، عدالت دنیزینده بوغولور

من هؤنکورره م عالَم یاتار گئجه لر

قالخار سَسیم گؤیه چاتار گئجه لر

بخت گَمی سی زیغا باتار گئجه لر

                                    بو داملاردا قارقا هر گون قاریلدار

                                    اودا من تک هر آخشام پیس زاریلدار

اورماندا بیر بوداق گئدیر ایشیغا

بو قوماردی!  آشیق ده ییر آشیغا

گئت بو شعری دئه اوخوسون عاشیغا

                                    قوی کوی دوشسون محرابلارا ، اودایا

                                    تبعید اولسون گؤزونده کی آدایا

خاطیره لر سن سیز منه زهر اولار

بولبول اؤلسه چمنده کی گول سولار

قارقا گلر نوحه دئیر توک یولار

                                    بولاقلاردا گون باتاندا قان گئده ر

                                    بولود آیین قاباغیندا سان گئده ر

بو داغلاردا گؤزده ن ایتن قایادی

آذربایجان طایفالاری سایادی

های سالان دا دئییر بس حاق هایادی

                                    شئر بابکین مازیارین هاردادی

                                    اولمایا کی دوستاقلاردا داردادی؟

بیر کیشی نی دارا چکدیز اوزاقدا

طوفان قالخدی اوددا سؤندو اوجاقدا

سوندان دونوب اوجاق قوردوز بوجاقدا

                                    دار اوستونده سوی ده ریسین قان آخسین!

                                    کیمسه باشین قووزامادی کی باخسین!

ای جماعت! سس سالمایین! آمان دی!

باش کسیبلر! بولاقدا قان روان دی!

گون باتیشدا باشین یاریر!  نه قان دی؟!

                                    اؤز جانین له اویناما ای قناری!

                                    لئیلاج ایله گَل قیزدیرما قوماری!

یئل کوفولدور!  بایقوش اوخور قالادا

قورد باجایا اؤزون سوخور قالادا

بیلمم تولکو نه لر توخور قالادا

                                    شئیطان  لای لای دئییر یاتیر قولاغا

                                    قیز تک گَلیر!  آما بنزیر  چولاغا!

گَل آغریم آل! یانیمدا قال! گؤزه لیم!

دیلینده ن سوز شعر تکین بال! گؤزه لیم!

حقیقتی سازینلا چال! گؤزه لیم!

                                    دوداق قویوم دوداغینا شاهیدین

                                    قورخمارام من ساریغیندان زاهیدین