غزل ترکی" آواز " اول اردیبهشتماه 1394

ایستیره م بیر شعر یازام عالَم اونا قان آغلایا

گؤزلر آغلاشسین اونا، دریا اولوب سئل باغلایا

ایستیره م آواز اولا اودتک کؤنول لر یاندیرا

اژدها تک پوسکوروب سکگیز بهشتی داغلایا

ایستیره م کی پرپر اولموش گول لره، بولبول توما

توک یولارکَن، گول یاسیندا ـ دار باشیندا دیغلایا

مفتی قوی یازسین هامی بولبول لره فتوایِ قتل

تا کی عاشیق کؤنلومو، قیرخ گوللَه ایله اوخلایا

من اؤلنده ن سونرا گلسین گول حبیبیم قبریمه

عطری مرحوم ائیله میشکن روحومو تا یُوخلایا

گؤیدَه اوُلدوزلار، گونش، آی، باش قویُوب ظوللمات لارا

بانقیریرلار آللاها، اویناتمادان اَل ساخلایا

هر زامان کی شاهدِ تبریزی یازسا بیر غزل

ساغلایان بیلمز کی هانچی بئیتینی چوخ ساغلایا!!